Azumi: Ganduje ya umarci ƴan KAROTA su sassauta wa jama’a

Gwamnatin jihar Kano ta bai wa hukumar KAROTA umarnin su sassauta wa al’umma a lokacin watan azumi.

Shugaban hukumar Baffa Babba Ɗanagundi ne ya bayyana hakan a zantawar sa kai tsaye da Freedom Radio ta cikin labaran Mu Leƙa Mu Gano na ranar Asabar.

Baffan ya ce, Gwamna ya basu umarni su ɗaga ƙafa ga al’umma saboda zuwan wata mai alfarma.

A saboda haka jami’an za su mayar da hankali ga aikin hukumar kare haƙƙin masu saye domin bankaɗo masu cutar da jama’ar jihar Kano.

“Zamu jingine ayyukan KAROTA gaba ɗaya kamar yadda mai girma Gwamna ya yi umarni a watan azumi, domin mu ƙara bankaɗo masu sayarwa da jama’a gurɓatattun kaya” inji Baffa.