Kano: An sake kama tarin gurɓatattun sinadaran haɗa lemo

Hukumar kare haƙƙin masu sayen kaya ta jihar Kano da haɗin gwiwar hukumar KAROTA sun cafke gurɓatattun sinadaran haɗa lemo waɗanda wa’adin ya ƙare a daren Asabar.

Jami’an hukumar sun cafke sama da katan 500 na sinadaran a kasuwar Singa, waɗanda aka sauya musu mazubi tare da canja bayanin lokacin ƙarewar wa’adin su.

Da yake jawabi yayin kamen, mai taimakawa Gwamnan Kano kan KAROTA Malam Nasir Usman Na’ibawa ya ce, kayayyakin da aka kama wa’adinsu ya ƙare tun a shekarun 2019 zuwa 2020.

Ya ce, an sauya musu mazubi inda aka jera su a kwalin taliya ta yadda ba za a gano su da wuri ba.