Ba mu fara daukar sabbin ma’aikata ba – DSS

Hukumar tsaron sirri ta DSS ta musanta rahoton da ake yadawa cewa tana daukar ma’aikata, kuma ta ce ba ta da wani shafin Facebook a halin yanzu.

Shugaban sashen yada labarai na hukumar Dr. Peter Afunanya ne ya sanar da hakan a Abuja, lokacin da yake musanta wannan rahoto da ake ta yadawa a shafukan sada zumunta na zamani.

Ya ce wani ne mai suna Jesustofunmi Nifemi Alabi ne ya bude shafin Facebook mai suna SSS/DSS Recruitment, domin yaudarar al’ummar da ke kwadayin neman aikin.

Peter Afunanya ya shawarci jama’a da ke neman aiki a DSS da ma sauran bayanai da su duba shafinta na intanet na www.gov.ng don karin bayani.