Ba ni da wani shiri na musanya wasu jami’an KAROTA – Inji Baffa Babba

Hukumar lura da zirga-zirgar ababan hawa ta Kano KAROTA ta yi martani kan wasu zarge-zarge da wasu cikin jami’an hukumar suka yi.

Jami’an dai sun zargi cewa shugaban hukumar na horar da wasu matasa a kwalejin Rumfa waɗanda ake sa ran za su maye gurbin wasu ma’aikatan hukumar ba tare da wani dalili ba a cewar su.

Sun kuma zargi cewa, an yanke wa da yawa daga jami’an hukumar albashi a watan da ya gabata, a don haka su ke neman majalisar dokokin Kano da hukumar ƙarɓar ƙorafe-ƙorafe da yaƙi da rashawa ta jihar Kano, da kwamishinan kuɗi kan su shiga lamarin domin kawo daidaito.

To kan waɗannan ƙorafe-ƙorafe wakilinmu Yusuf Ali Abdallah ya tuntuɓi Baffa Babba Ɗanagundi wanda ya ce babu gaskiya cikin iƙrarin na su.