Ba za mu dawo da ƴan sandan SARS ba – IG Alƙali Baba

Babban sufeton ‘yan sandan ƙasar nan Usman Alƙali Baba, ya ce rundunar ba ta da wani shiri na sake dawo da ‘yan sandan yaki da manyan laifuka na fashi da makami da shugaban ƙasa ya rushe wato SARS.

Wannan na cikin wata sanarwa da mai magana da yawun rundunar Frank Mba ya fitar ranar Alhamis a Abuja.

Frank Mba ya ce sanarwar ta biyo bayan yadda wasu kafofin yada labarai ke yaɗa rahoton cewa babban sufeton ‘yan sanda ya ba da umarnin sake dawo da ‘yan sandan na SARS.

Ya kara da cewa tun bayan rushe ‘yan sandan SARS din ne rundunar ta samar da tsarin cike gibinsu, domin ci gaba da aikin kare rayuka da dukiyoyin al’ummar Najeriya.