*Ba za mu lamunci cin zarafin da aka yi wa shugaban kungiyar ASUU ba – Jami’ar Bayero*

Kungiyar malaman jami’o’i ta kasa ASUU reshen jami’ar Bayero a Kano, ta nuna rashin jin dadinta da yadda wasu jami’an tsaron na DSS suka ci zarafin shugaban kungiyar Farfesa Abdulkadir Muhammad.

Wannan na cikin wata sanarwa mai dauke da sa hannun shugabanta Farfesa Haruna Musa da kuma sakatarenta Dr Yusuf Umar Madugu.

Sanarwar ta ce lamarin ya faru a ranar 18 ga wannan watan Agusta da ya gabata inda jami’an DSS din suka tare shi a kan titi a nan Kano lokacin da suke tafiya suna jiniya, suka lalata masa mota sannan suka ci zarafinsa.

Haka zalika kungiyar ta bukaci hukmar ta DSS ta gudanar da bincike a kai don hukunta wadanda ake zargi da cin zarafin shugaban na su, tare da kiyaye aukuwar hakan a nan gaba.