Buhari na ganawa da gwamnoni da manyan hafsoshin kasar nan

Shugaban kasa Muhammadu Buhari, ya jagoraranci wani taro kan harkokin tsaro tare da kwamitin kula da harkokin tsaro na kungiyar gwamnonin kasar nan karkashin jagorancin gwamnan jihar Kogi Yahaya Bello.

Rahotanni sun ce taron ya kuma samu halartar mataimakin shugaban kasa farfesa Yemi Osinbajo da Sakataren gwamnatin tarayya Boss Mustapha da da kuma shugaban ma’aikatan fadar shugaban kasa, farfesa Ibrahim Gambari.

Sauran wadanda suka halarci taron sun hada da sufeto janar na ‘yan sandan kasar nan Muhammad Adamu da babban hafsan tsaro na kasa janar Gabriel Olonisakin da babban hafsan sojin ruwa, Vice Admiral Ibok Ibas da babban hafsan sojojin kasa laftanal janar Tukur Buratai wanda manjo janar US Yakubu ya wakilta.

Sauran sune: babban hafsan sojin sama na kasar nan Air Marshal Sadique Abubakar da daraktan hukumar leken asiri ta kasa NIA Ambasada ahmed Rufai da kuma daraktan hukumar tsaron sirri ta DSS Yusuf Bichi.

A bangaren gwamnoni kuwa wadanda suka halarci taron sun hada da: gwamnan jihar Kogi Yahaya Bello da na Bayelsa Sanata Duoye Diri da gwamnan jihar Borno farfesa Babagana Umara Zulum da David Umahi na jihar Ebonyi da kuma Babajide Sanwo-Olu na jihar Lagos.