Buhari zai gina wa jami’an NDLEA bariki

Shugaban kasa Muhammadu Buhari ya amince da gina bariki ga ma’aikatan hukumar hana sha da fataucin miyagun kwayoyi ta kasa NDLEA a fadin kasar nan.

Shugaban hukumar NDLEA Birgediya Janar Buba Marwa Mai ritaya ne ya bayyana hakan ga manema labarai na fadar gwamnati.

Wannan na zuwa ne jim kadan bayan yayi wata ganawa da shugaba Buhari a fadar sa, don yi masa bayanin ayyukan hukumar.

Shugaban na NDLEA ya ce gina barikin ga ma’aikatan hukumar ya zama wajibi ko don kare su da iyalansu daga masu aikata miyagun laifuka.

Buba Marwa ya buga misali da cewa, mafi yawa daga jami’an tsaro irin su Sojoji, yan sanda, Kwastam, hukumar kula da shige da fice, suna da bariki, amma ban da NDLEA.