Buhari ya nemi afuwar ‘yan Najeriya kan sabunta rajistar ajiya na banki

Gwamnatin tarayya ta nemi afuwar ‘yan Najeriya game da wani rahoto da ta fitar a jiya da ke cewa, kowane dan kasar nan da ke da asusun ajiya na banki da ya je ya sabunta rajistar asusunsa.

Dazu-dazun nan ne gwamnati ta fitar da sabon sanarwar tana mai cewa, an samu kuskure ne wajen fitar da waccan sanarwa domin kuwa lamarin bai shafi kowa da kowa ba.

Saboda haka hukumar tattara kudaden shiga ta kasa FIRS za ta fayyacewa al’ummar kasa yadda lamarin ya ke daga bisani.

Tun farko dai a jiya alhamis ne gwamnatin tarayya ta bukaci dukkannin masu asusun ajiya na bankuna ko cibiyoyin kudi a kasar nan da su gaggauta zuwa su sabunta rajistar asusun nasu.

Gwamnatin ta wallafa hakan ta cikin wani sako da ta wallafa a shafinta na Twitter a jiya alhamis.