Buhari ya nemi sahalewar majalisar wakilai kan karin kasafin kudi

Gwamnatin tarayya ta aikewa da majalisar wakilai karin kasafin kudi da za a kashe wajen samar da allurar rigakafin COVID-19 ga al’ummar kasar nan.

Ministar Kudi Kasafi da Tsare-tsare Hajiya Zainab Ahmed ce ta bayyana hakan a yau Alhamis, ta na mai cewa za a shirya daftarin kasafin kudin a watan Maris mai kamawa.

Ahmed tayi magana ne a jawabin farko na sanarwa da aka gabatar a Fadar Shugaban Kasa dake Abuja.

“Karin kasafin kudi, na farko zai kasance a watan Maris game da annobar COVID-19 amma kuma za mu yi bitar tsakiyar shekara kamar yadda muka yi a bara na kasafin kudin.”

“Idan a lokacin muna yin bitar kuma akwai bukatar komawa don yin duk wani gyara na karin kasafin kudi, a wancan lokacin, za mu dauki wannan shawarar; idan ba haka ba, za mu kawo rahoton bita kawai,” inji ta.