Buhari ya umarci jagororin tsaro da su zakulo ‘yan ta’adda da masu daukar nauyinsu.

Mai bai wa shugaban kasa shawara kan harkokin tsaro manjo janar Babagana Monguno mai ritaya, ya ce,  shugaban kasa Muhammadu Buhari ya umarci jagororin tsaron kasar nan da su yi duk me yiwuwa wajen ganin sun zakulo ‘yan ta’adda da masu daukar nauyinsu a duk inda suke a fadin kasar nan.

A cewar shugaban kasar wajibi ne a hukunta duk wadanda suke daukar nauyin tashe-tashen hankula a Najeriya.

A yayin zantawa da manema labarai a fadar shugaban kasa a yau talata manjo janar Babagana Monguno mai ritaya ya ce shugaba Buhari ya ba da wannan umarni ne yayin taron da ya gudanar da jagororin tsaron a fadar asorok.

Janar Babagana Monguno ya ruwaito shugaban kasar na cewa gwamnatin sa ba za ta lamunci ci gaba da zubar da jinin jama’a babu gaira babu dalili ba da ke ci gaba da faruwa a kasar nan.