Buhari zai gina katanga a gabar ruwan kogin Kaduna

Gwamnatin tarayya ta ce nan ba da dadewa ba, za ta gina Katanga a gabar ruwan Kogin Kaduna domin dakile matsalar ambaliyar ruwa da ke addabar al’ummar da ke makotaka da Kogin.

Mai rikon mukamin shugaban cibiyar kula da albarkatun ruwa ta kasa da ke Kaduna Dr. Martin Edufie ne ya bayyana hakan a jiya yayin zantawa da manema labarai.
Ya ce jama’a da dama sun rasa rayukansu yayin da dukiyoyi na miliyoyin nairori suka salwanta sakamakon ambaliyar ruwa wanda Kogin Kaduna ya janyo.

Dr Martin Edufie wanda ke jawabin a wani bangare na bikin ranar Koguna ta duniya, y ace gwamnati ta dau wannan mataki ne biyo bayan nazartar da kwararru su ka yi ga Kogin na Kaduna tsawon shekaru.

Saboda haka ya ce, nan gaba kadan ba da jimawa ba gwamnati za ta gina Katanga a gefen Kogin don hana ruwa haurawa.