Da ɗumi-ɗumi: Ana zargin ƴan bindiga sun sace gwamman ɗalibai a Kebbi

Rahotanni daga jihar Kebbi na cewa wasu ƴan bindiga sun kai hari makarantar Sakandiren tarayya ta garin Birnin Yauri.

Wani mazaunin garin ya shaidawa Freedom Radio cewa, al’amarin ya faru ne da safiyar yau Alhamis.

Inda aka yi ta ɗauki ba daɗi tsakanin ƴan bindigar da jami’an tsaro har daga bisani suka tafi da ɗalibai da dama.

Freedom Radio ta tuntuɓi jami’in hulɗa da jama’a na ƴan sandan jihar, sai dai bai ɗauki kiran wayar ba, mun kuma aika masa da saƙon kar-ta-kwana amma har kawo lokacin haɗa wannan rahoto bamu samu amsa ba.