Da kudaden ma’adinai ‘yan ta’adda ke sayan makamai – Buhari

Shugaban kasa Muhammadu Buhari ya ce gwamnatin sa ta gano cewa ‘yan ta’adda suna amfani da haramtattun kudade da suke samu wajen hakar ma’adinai ba bisa ka’ida ba, wajen sayo makamai da suke aikata ta’addanci a sassa daban-daban na kasar nan.

Muhammadu Buhari ya bayyana hakan ne a jiya talata lokacin da ya ke bude bikin kasa da kasa don nuna ma’adinai wanda ke gudana a birnin Badun babban birnin jihar Oyo.

Shugaban kasar wanda ministan ma’adinai Dr. Uchechukwu Ogah ya wakilta ya ce, gwamnatinsa za ta ci gaba da aiki tukuru wajen kare lafiya da dukiyar al’ummar kasar nan.

Shugaban kasar ya ce tun da gwmanatinsa ta gano wannan lamari shi ya sanya ta dauki matakin da ya dace.

‘‘Yan ta’adda suna shiga kauyuka wuraren da ake hakar ma’adinai suna aiki ba bisa ka’ida ba, kudaden da suke samu sai su je su sayi makamai da shi’’ a cewar shugaban kasar’’.