Dakarun Operation Sahel Sanity sun kashe ‘yan bindiga a Zamfara

Dakarun operation Sahel Sanity na rundunar sojin kasar nan da ke aikin samar da tsaro a yankin arewa maso yammacin kasar nan, ta ce, ta kashe wasu ‘yan bindiga guda uku a jihohin Katsina da Zamfara.

A cewar rundunar ta kuma kama wasu mutane goma da ake zargin ‘yan bindiga ne da kuma masu kai musu tsegumin abinda ke faruwa a gari.

Mai magana da yawun dakarun kasar nan da ke bakin daga, Burgediya janar Bernard Onyeuko ne ya bayyana haka, ta cikin wata sanarwa da ya fitar a garin Katsina.

Sanarwar ta ce, a ranar goma sha shida ga wannan wata ne dakarun na Operation Sahel Sanity yayin wani rangadi a dajin Dumburum suka kashe ‘yan bindigar.