Daya daga cikin kwamishinoni a Gombe ya yi murabus

Kasa da kwanaki 10 daya rage a gudanar da zaben gwamnoni, kwamishinan kimiyya da fasaha na jihar Gombe, Abishai M. Andirya, ya yi murabus.

Abishai Andirya, ya bayyana yin murabus din ne a jiya Laraba yayin da yake zantawa da manema labarai a ofishinsa, ‘inda ya ce ya ajiye mukaminsa ne sakamakon shi kwamishina ne kawai a baki’.

A cewarsa, ‘tun da aka nada shi watanni uku da suka wuce, sau daya kawai ya gana da gwamnan shima a taron majalisar zartarwar jihar ne’.

A cikin kwafin takardar murabus din da jaridar Daily Trust ta samu, Andirya ya ce ‘ya yi murabus ne tun daga ranar 20 ga watan Fabrairun daya gabata’.

Rahoton: Abdulkadir Haladu Kiyawa