Duk da hatsaniyar da ta faru, karshe gwamnan Gombe ya nada Danladi Sanusi a sarautar Mai Tangale

Gwamnan jihar Gombe Alhaji Muhammad Inuwa Yahaya ya nada Malam Danladi Sanusi Maiyamba a matsayin sabon Mai Tangale.

Nadin nasa na cikin wata sanarwa ce mai dauke da sa hannun daraktan yada labarai na gidan gwamnatin jihar Gombe Isma’ila Uba Dan Misili.

Sanarwar ta ruwaito gwamnan na cewa, kamar yadda dokar nadi da sauke sarakunan gargajiya ta jihar Gombe ta shekarar dubu biyu da ashirin ta zayyana, Alhaji Muhammad Inuwa Yahaya ya nada Malam Danladi Sanusi Maiyamba a matsayin sabon basaraken kasar Tangale.

Sanarwar ta ruwaito kwamishinan kananan hukumomi da masarautun gargajiyar na jihar Gombe Ibrahim Dasuki Jalo na bayyana amincewar gwamnan wajen nadin Danladi Sanusi Maiyamba a matsayin sarautar Mai Tangale.

Kwamishinan ya kuma mikawa sabon basaraken kasar ta Tangale wasikar nadin nasa a gidansa da ke Poshiya a karamar hukumar Billiri.