Farashin shinkafa ya fadi warwas a Najeriya – Emefiele

Gwamnan babban bankin kasa (CBN) Godwin Emefiele, ya ce, farashin buhun shinkafa ya fadi a kasuwannin Najeriya a bana idan aka kwatanta da shekarar da ta gabata lokacin da ake fama da cutar covid-19.

Ya kuma alakanta faduwar farashin buhun shinkfar mai nauyin kilo hamsin da irin tallafi da bankin na CBN ke bayarwa a bangaren noman shinkafa.

Mista Emefiele ya bayyana hakan ne yayin zantawa da manema labarai a ranar talata a Abuja.

Ya ce, farashin shinkfa ya tashi a bara ne saboda matsalar cutar corona sannan a bangare guda gwamnatoci sun saye dan wanda ya rage su ka rabawa jama’a.

Gwamnan na CBN ya kuma shawarci manoma da su karkatar da akalarsu zuwa noman rani wanda hakan zai taimaka gaya wajen samar da isasshen abinci ga kasar nan.