Fashewar Gas: Mutane 9 ne suka mutu zuwa yanzu – SEMA

Hukumar bada agajin gaggawa ta jihar Kano SEMA ta ce zuwa yanzu adadin waɗanda suka mutu sakamakon fashewar tukunyar Gas sun kai mutane 9 yayin da mutane sama da 30 suka jikkata.

Shugaban hukumar Kwamared Sale Aliyu Jili ne ya tabbatar da hakan ga Freedom Radio da yammacin ranar Talata.

“A yanzu haka mun ziyarci wajen da lamarin ya faru kuma an ba mu rahoton cewa an zaro gawarwakin mutane 9 wadanda gini ya danne sanadiyyar fashewar tukunyar” a cewar Jili.

“Gwamanan Kano Dakta Abdullahi Umar Ganduje ya bada umarnin a tattara rahotannin wadanda suka jikkata domin ya duba yadda za a iya tallafa musu”.

Kwamared Sale Aliyu Jili ya kuma ce, da zarar an kammala tattara bayanan waɗanda abin ya rutsa da su za a mikawa gwamnati domin ta basu tallafi.