Gobara ta ƙone shaguna 40 a Zawaciki

Fiye da shaguna 40 sun ƙone a Unguwar Zawaciki, sakamakon gobarar da ta tashi da misalin ƙarfe 12:30 na daren Talatar makon nan zuwa wayewar garin yau Laraba.

Rahotonni sun bayyana cewa ana zargin gobarar ta faru ne sakamakon wutar lantarki.

Shagunan da suka ƙone sanadiyyar gobarar sun haɗa da na sayar da kayan masarufi da shagon sayar da kujeru da na Siminti da kuma shagon ɗinki.

Sai dai zuwa lokacin haɗa wannan rahoto ba a kai ga tattara alƙaluman dukiyar da gobarar ta laƙume ba kamar yadda Malam Garba Ibrahim Lahaula shugaban masu kasuwanci a yankin ya bayyana.