Gwamna Abba Kabir ya aika wa majalisa sunan jami’an riƙo na ƙananan hukumomi

Gwamnan jihar Kano Injiniya Abba Kabir Yusuf, ya aike wa majalisar dokokin jihar Kano sunayen mutanen da za su jagoranci shirya zaɓen ƙananan hukumomi da ke tafe.

Ta cikin wasiƙar gwamna Abba Kabir Yusuf, ya buƙaci ta tantancewa tare da amincewa da mutanen da ya ke son naɗawa a matsayin jami’an riƙo na ƙananan hukumomi.

Shugaban majalisar Alhaji Jibril Isma’il Falgore, ne ya karanta wasiƙar a zaman majalisar na yau.

A nasa ɓangaren, shugaban masu rinjaye na zauren Lawan Hussaini Chediyar ƴan Gurasa, ya yi ƙarin haske kan wasiƙar, ya na mai cewa doka ce ta tanadi yadda za a naɗa mutanen da za su kula da ƙanannan hukumomi yayin da wa’adin zaɓabbu ya ƙare.

Bayan amincewa da buƙatar gwamnan, majalisar dokokin ta umarci waɗanda gwamnan ya tura da sunayen nasu da su ke majalisar a gobe Laraba da misalin ƙarfe 12:00 domin tantance su.