Gwamna Abba ya bayar da tallafin kuɗi ga mata 1028 a kano

Gwamnan jihar Kano Injiniya Abba Kabir Yusuf ya ƙaddamar da bayar da tallafin kuɗi naira dubu 20 ga mata 1028 na ƙananan hukumomi 44 dake jihar.

Gwamna Yusuf ya ƙaddamar da bayar da tallafin ne a ranar lahadi, a wani ɓangare na ci gaba da murnar ranar mata ta duniya da majalisar ɗinkin Duniya ta ware duk ranar 8 ga watan Maris a matsayin ranar mata ta duniya.

Gwamna Abba Kabir Yusuf, yayi kira ga matan da suka anfana da wannan tallafin da su mayar da hankali wajen gudanar da sana’o’in dogaro da kai.

Wasu matan da suka anfana da tallafin, sun bayyana farin cikin su, inda suka ce zasu mayar da hankali wajen gudanar da sana’o’in dogaro da kai domin wannan abu da gwamnati tayi musu ba ƙaramin ƙaimi zai ƙara musu ba.

Gwamnan ya ce gwamnatin sa zata ci gaba da fito da tsare-tsaren da zasu tallafawa Al’ummar jihar Kano.