Gwamna Ganduje  ya kafa kwaimitin mika mulki ga Abba Kabir Yusuf

Gwamnan jihar Kano Dr. Abdullahi Umar Ganduje, ya kafa kwamitin miƙa mulki ga zaɓaɓɓen Gwamnan jiha Engr. Abba Kabir Yusuf.

A wata sanarwa da Kwamishinan yaɗa labaran Kano Malam Muhammad Garba ya fitar, ya ce Kwamitin na ƙarƙashin shugabancin Sakataren Gwamnatin Kano Alhaji Usman Alhaji.

Sai kuma wasu Kwamishinoni da manyan jami’an gwamnati da kuma wakilci daga ɓangaren sabon zaɓaɓɓen Gwamnan.

Wannan dai na zuwa ne kwana guda bayan da sabon zaɓaɓɓen gwamna ya ƙaddamar da nasa Kwamitin na karɓar mulki.

Jihar Kano dai na cikin jihohin da siyasarta ke ci gaba da ɗaukar ɗumi sakamakon samun sauyin gwamnati da za a yi daga jam’iyyar APC mai mulki zuwa jami’yyar adawa ta NNPP.