Gwamnatin jihar Kaduna na kokarin zamanantar da yanayin aiki a jihar nan da watan Disamba

Gwamnatin jihar Kaduna, ta rage ranakun ayyukan gwamnati a jihar zuwa kwana 4 a wani mataki na garambawul da maida aikin gwamnatin zuwa wani mataki na zamani.

A wata sanarwa da Mai Baiwa Gwamnam jihar shawara kan harkokin yada labarai Muyiwa Adekeye ya fitar, ya ce daga yanzu ranakun aiki a jihar sun koma Litinin zuwa Alhamis, daga karfe 8 na safe zuwa 5 na yamma.

Wannan dai wani mataki ne na baiwa Ma’aikata damar hutawa da iyalansu da kuma basu damar gudanar da harkokin noma.

Muyiwa ya ce shirye-shirye sun yi nisa domin ganin su ma fannin ma’aikatu masu zaman kansu sun bi wannan sabon salon aiki.

Sai dai kuma gwamnati tace wannan tsari banda ma’aikatan fannin ilimi da lafiya da sauran ayyukan daya zama dole a gudanar da su.