Gwamnatin jihar Legas ta dakatar da bikin ranar yancin kai

Gwamnatin jihar Lagos ta soke bikin ranar yancin kan Najeriya, sakamakon annobar Covid-19.

Gwamnan jihar Babajide Sanwo-Olu wanda ya bayar da umarnin a wata sanarwa da ya fitar ya ce an soke bukukuwan da ake yi a irin wannan ranar ne da suka hadar da fareti domin kaucewa taruwar jama’a sama da hamsin.

Ya ce jihar ta zabi soke yi bikin murnar zagayowar ranar yancin kan ne saboda kaucewa yaduwar cutar COVID-19.

Gwamnan ya taya mazauna jihar murnar wannan rana inda ya shawarce su da su yi bikin cikin nutsuwa a gida tare da yi wa kasa addu’a.