Gwamnatin Kano ta umarci masu shaguna a filayen gwamnati su kwashe kayansu

Gwamnatin jihar Kano, ta umarci mutanen da ke da shaguna a filayen gwamnati da aka yi gini ba bisa ka’ida ba, da su tabbatar sun kwashe kayansu.

Gwamnatin ta bada umarnin ne ta cikin wata sanarwa da Sakatarenta Dakta Abdullahi Baffa Bichi ya fitar a Alhamis din makon nan.

Ta cikin sanarwar, gwamnatin ta sanar da dukkanin masu kaya a shagunan da aka gina a jiki ko cikin makarantu ko Maƙabartu da Asibitoci da Masallatai ko gefen Badala da filayen ma’aikatu da Filayen wasanni da sauran wuraren shakatawa mallakin gwamnati da cewa su yi gaggawar kwashe dukkanin kayan su da ke cikin shagunan da aka gina a wadannan wurare ba tare da ɓata lokaci ba.