Gwamnatin Tarayya ta bayar da hutun bikin ranar samun yanci

Gwamnatin tarayya  ta ayyana  gobe Laraba a matsayin ranar hutu a fadin  ƙasar domin bikin cikar Najeriya shekaru 65 da samun ƴancin kai.

Hakan na kunshe a cikin wata sanarwa da ministan cikin gida Olibunmi Tunji-Ojo ya fitar, wadda a cikinta ya taya ƴan Najeriya murnar cimma wannan babban matsayi.

Ministan ya kuma buƙaci ƴan ƙasar su ci gaba da nuna kishin ƙasa da hadin kai da juriya, da ya ce su  ke taimaka wa ƙasar wajen dunƙulewa waje guda ga mabanbantan kabilun ta  tun lokacin samun ƴancin kai a 1960.

A ranar 1 ga watan Otoban 1960 ne dai Najeriya ta samu ƴancin kai daga Turawan mulkin Birtaniya da suka yi mata mulkin mallaka.