Gwamnatin tarayya ta ayyana Juma’a a matsayin ranar hutun ma’aikata

Gwamnatin tarayya ta ayyana ranar Juma’a 1 ga watan Oktoba a matsayin ranar hutu ga ma’aikata.

Hutun wani ɓangare ne na murnar cikar Najeriya shekaru 61 da samun ‘yancin kai.

Ministan cikin gida Rauf Aregbesola ne ya bayyana hakan a madadin gwamnatin tarayya.

A cikin wata sanarwa da Dr Shuaib Belgore, babban sakataren ma’aikatar ya fitar na bayyana cewa minista Rauf ya taya dukkanin ƴan Najeriya murnar bikin zagayowar shekarar tare da ba da tabbacin jajircewar gwamnati na magance duk wasu ƙalubale.

Rauf Aregbesola ya yi kira ga ƴan Najeriya da su hada hannu da gwamnati don tabbatar da samun ci gaba.