Gwamnatin tarayya ta bukaci a sanya masu fassarar yaren kurame yayin gabatar da labarai.

Gwamnatin tarayya ta umarci gidajen Talabijan da su yi biyayya ga umarnin hukumar kula da kafafen yada labarai ta kasa NBC na samar da masu fassarar yaren kurame yayin da suke gabatar da labarai.

Ministan yada labarai da raya al’adu Alhaji Lai Mohammed ne ya ba da umarnin a yau Litinin a birnin tarayya Abuja yayin ganawa ta musamman da jami’an Cibiyar masu bukata ta musamman ta kasa.

Ministan ya ce za a sanar da umarnin ga dukkan gidajen Talabijin na gwamnati da masu zaman kansu a gobe Talata.

Rahotanni sun bayyana cewa umarnin ya biyo bayan korafin da Babban Daraktan cibiyar masu bukata ta musamman Mista David Anyaele ya yi, da ke cewa ana nuna wa mambobinsu musamman masu lalurar “ji” wariyar launin fata musamman ta bangaren yada labarai.