Gwamnatin tarayya ta tabbatar da mutuwar shugaban kungiyar ISWAP  Malam Baƙo

Gwamnatin tarayya ta tabbatar da mutuwar magajin shugaban kungiyar ISWAP Malam Bako.

Mai bai wa shugaban kasa shawara kan harkokin tsaro manjo janar Babagana Mongonu ya tabbatar da mutuwar sa.

Mongonu ya bayyana hakan yayin da yake yiwa manema labaran fadar shugaban kasa bayani jim kadan bayan kammala wata ganawa kan sha’anin tsaro jiya a fadar shugaban kasa.

Ya ce, Malam Bako shi ne magajin Abu-Mus’ab Albarnawi wanda ke rikon mukamin shugaban kungiyar ISWAP.

A cewar sa, Bako ya mutu ne adaidai lokacin da yake tare da jiga-jigan mambobin kungiyar.

Wannan na zuwa ne sama da mako guda bayan da babban hafsan tsaron kasar nan Janar Lucky Irabor ya tabbatar da mutuwar tsohon shugaban kungiyar ISWAP Abu Musab Al-Barnawi.