Gwamnatin Tarayya za ta dage dokar hana magoya baya shiga kallon wasanni – Dare

Ministan Matasa da Wasanni, Sunday Dare, ya ce kwanannan za a dage dokar hana ‘yan kallo shiga filin wasa da Kwamitin Gwamnatin Tarayya kan yaki da cutar Corona ya sanya a Najeriya.

Dare ya bayyana haka ne a ranar Talata 29 ga watan Yuni yayin wata ziyara da ya kai wa sansanin Super Eagles rukunin B da ke Abuja.

Yanzu haka dai ‘yan wasan na shirye-shiryen buga wasan sada zumunci na kasa da kasa da Mexico a ranar Lahadi 4 ga watan Yuli a Amurka.

“Muna fatan ganin magoya bayanmu sun dawo ci gaba da shiga kallon wasanni a filayen wasa da zaran mun tabbatar matakan dakile yaduwar cutar COVID-19,” in ji Dare.

Ministan ya kara da cewa, “Magoya baya suna da matukar mahimmanci ga wasanni, saboda haka za mu sanya ido kan lamarin sannan mu yi aiki tare da hukumomin da abin ya shafa don aiwatar da hakan.”