Gwamnatin tarayya zata baiwa jihohi kudaden Paris club

Gwamnatin tarayya ta ce nan bada dadewa ba, za ta bai wa jihohi kason karshe na kudaden Paris Club da ya kai sama da naira biliyan dari shida da arba’in da tara.

Ministan kudi Zainab Ahmed ce ta bayyana haka yayin wani taron manema labarai jiya a Abuja

Ta ce tuni ma’aikatar kudi ta kammala aikin tantance kididdigar sauran kudaden da ya rage domin mayar da shi ga jihohi.

Da ta ke magana kan kasafin kudi kuwa, ministar cewa ta yi, tsakanin watan Yunin bara lokacin da shugaban kasa ya sa hannu kan kasafin kudin shekarar da ta gabata zuwa watan Mayun bana gwamnatin tarayya ta fitar da sama da naira tiriliyan biyu don gudanar da manyan ayyukan raya kasa a sassa daban-daban na kasar nan.