Hisbah ta kama matashin da ke shunawa mata gabansa a Kano

Hukumar Hisbah a Kano ta tsare wani matashi bisa zargin shunawa mata gabansa tsirara a unguwar Na’ibawa Rimin Hamza.

Tun da farko dai matan auren unguwar ne suka yi ƙorafi ga jami’an sintirin yankin.

Matan sun ce, matashin na kwaye al’aurarsa idan ya ga mata sun zo wucewa.

Matashin ya shaidawa Freedom Radio cewa, yana aikata hakan ne a lokacin da ya shiga wani sauyin yanayi.

Mahaifiyar matashin ta ce, bata taɓa sanin yana aikata hakan ba, amma ita ma zata ɗauki mataki a kai.

Ustaz Muhammad Cheɗi shi ne shugaban sashen gudanarwa na Hisbah ta Kano ya ce, za su ci gaba da tsare matashin har zuwa lokacin kammala bincike.