Hukumar FRSC ta yi ƙarin girma ga jami’anta 445

Hukumar kiyaye abkuwar haɗura ta ƙasa, ta yi ƙarin girma ga wasu manyan jami’anta 445.

Jami’in yaɗa labaran hukumar Bisi Kazeem ne ya bayyana hakan ta cikin wata sanarwar da ya fitar jim kaɗan bayan wani taron da hukumar ta gudanar.

Shugaban hukumar Barista Bukhari Bello, ya ce waɗanda aka ƙarawa girman sun haɗar da manyan mataimakan kwamandojin kula da manyan hanyoyi guda 264 zuwa manyan kwamandoji.

Sai kuma ƙananan mataimakan kwamandojin kula da manyan hanyoyi da aka ƙara musu girma zuwa manyan mataimaka su 181, tare da bukatar su da su ƙara ƙaimi wajen kiyaye abkuwar haɗura a kan hanyoyin ƙasar nan.