Hukumar kula da yanayi ta kasa NIMET ta yi hasashen samun rana mai zafi tsawon kwanaki 3 a kasar nan

Hukumar kula da yanayi ta kasa ta yi hasashen cewa za’a samu rana mai zafi  tsawon kwanaki 3 daga Litinin din nan zuwa Laraba a fadin kasar nan.

Rahoton hasashen da hukumar ta fitar ranar Lahadi ya nuna cewa akwai yiwuwar samun tsawa mai karfi a sassan jihohin Yobe da Adamawa da Gombe sai Kaduna da Taraba.

A cewar hasashen, ana sa ran samun ruwan sama tsawon kwanaki 3 a jihohin Ogun da Ondo da Osun da Imo da Edo da Enugu da Anambra da Ekiti da Lagos da Rivers da Akwa Ibom sai Bayelsa da Delta da kuma Cross River.

Haka kuma hukumar ta yi hasashen yankin arewa ta tsakiya zai kasance cikin hadari da tsawa a sassan Nasarawa da Filato da Benue da Neja sai Kogi da Birnin Tarayya a safiyar ranar talata.