Jami’an Civil Defence sun cafke matashin da ya yi yunƙiurin shiga ɗakin kwannan ɗalibai mata

Rundunar tsaro ta Civil Defense shiyyar Kano, ta kama wani matashi da ake zarginsa da yin ɓadda kama ta hanyar yin shigar mata yana ƙoƙarin shiga dakin kwanan ɗalibai a wata jami’a mai zaman kanta da ke tsakiyar birnin na Kano da tsakar dare.

Mai magana da yawun rundunar SC Ibrahim Idris Abdullahi, ne ya bayyana hakan a wata sanarwa da ya fitar.

Ya ce, an kama wanda ake zargin ne mai suna Muhammad Munzali mai kimanin shekaru 35 ɗan asalin karamar hukumar Shanono a dai-dai lokacin da ya ke kokarin shiga dakin kwanciyar matan.

Sai dai yayin amsa tambayoyi wanda ake zargin ya ce ba da saninsa ya shiga wurin ba, ya zata wani Otal ne.

Daga bisani rundunar tsaron ta Civil Defence, ta ce wanda ake zargin na tsare a hannunsu suna ci gaba da gudanar da bincike domin daukar mataki na gaba kansa.