Jami’an tsaro sun kashe ƴan bindiga 32 a jihar Nije

Hadakar jami’an tsaron kasar nan sun samu nasarar hallaka ‘yan bindiga 32 a Jihar Niger, bayan sun tsere daga jihar Zamfara.

Jaridar PRNigeria ta rawaito cewa jami’an tsaron sun kashe ‘yan bindigar ne jiya lahadi a yankin Bangu Gari da ke karamar hukumar Rafi ta Jihar Niger.

Kuma sun tsere ne daga sansanoninsu na Danjibga da Munhaye dake karamar hukumar Tsafe ta Jihar Zamfara.

Wannan na zuwa ne bayan da ‘yan bindigar suka kai hari ofishin ‘yan sanda na Bagu Gari a karamar hukumar Rafi ta Jihar Niger, tare da kashe ‘yan sanda biyar.