JUSUN: Ma’aikatan shari’a a Najeriya za su tsunduma yajin aiki

Kungiyar ma’aikatan shari’a ta kasa reshen jihar Kano (JUSUN) ta ce za ta rufe dukkanin kotuna da ma’aikatun shari’a a kasar nan daga ranar 6 ga watan Afrilun 2021.

Hakan na cikin wata sanarwar da shugaban kungiyar na kasa reshen jihar Kano, Mukhtar Rabi’u Lawan, ya rabawa manema labarai.

Sanarwar ta ce hakan ya biyo bayan umarnin da uwar kungiyar ta kasa ta bayar, tun a ranar daya ga watan da muke ciki na Afrilu kan tafiya yajin aikin.

Hakan kuma ya sanya kungiyar a nan Kano ke umartar dukkanin membobinta da suyi biyayya ga umarnin uwar kungiyar kan batun zama a gida tare da rufe dukkanin kotuna da ma’aikatun shari’ar daga ranar shida ga watan Afrilun.