Kaduna: Harin yan bindiga yayi sanadiyyar mutuwar mutane 9

Rundunar yan sandan jihar Kaduna ta tabbatar da mutuwar mutane 9 tare da jikkatar mutum guda, sakamakon harin da “yan bindiga suka kai a kauyen Ungwan Dooh (Mado) a karamar hukumar Zangon Kataf.

Wata sanarwa da kwamishinan tsaro da harkokin cikin gida na jihar Samuel Aruwan ya fitar, ta ce rundunar Operation Safe Haven ce ta kai rahoton hakan ga gwamnatin jihar Kaduna.

Muna buƙatar ƙarin jamia’n tsaro a Kaduna – El-rufa’i

Aruwan ya ce, cikin gaggawa jami’an tsaron suka amsa kiran zuwa yankin, sai dai tuni maharan suka tsere da ganin sojojin, wanda hakan ne ya bada damar tattara gawarwakin wadanda suka rasa ran su a harin su 9.

Sanarwa ta ce, rundunar Operation Safe Haven ta kuma ceto mutane 12 da suka yi gudun ceton rai, sai dai har yanzu ba a kammala tattara adadin wadanda suka rasa ran su a harin ba.