Kaduna: Yan sanda sun musanta rahoton yin garkuwa da mutane 160 a coci-coci

Rundunar ƴan sandan Najeriya ta musanta rahotannin da ake yaɗawa na garkuwa da sama da mutane 160 a wasu coci-coci da ke ƙauyen Kurmin Wali a ƙaramar hukumar Kajuru ta jihar Kaduna.

Rundunar ta ce wasu marasa kishi ne ke yaɗa wannan labari da nufin tayar da hankalin jama’a.

A jiya  Litinin ne wasu daga cikin jaridun kasar nan  suka  bayar da rahoton sace mutane fiye da 100 a wuraren ibadah daban-daban na ƙauyen Kurmin Wali, inda suka ce lamarin ya faru ne a ranar Lahadi 18 ga watan Janairu.

Jaridar Daily Trust ta ruwaito cewa shugaban ƙungiyar kiristocin kasar nan   CAN, reshen jihar Kaduna Reberan Joseph John ya tabbatar mata da aukuwar lamarin.