Kamata yayi gwamnatin tarayya ta ayyana ƴan bindiga a matsayin ƴan ta’adda – El-rufa’i

Gwamnan jihar Kaduna Nasir El-Rufai ya yi kira ga gwamnatin tarayya da ta ayyana ƴan bindiga a matsayin ƴan ta’adda da ke barazana ga zaman lafiyar Arewa maso gabashin ƙasar nan.

Nasir El-Rufai ya bukaci hakan lokacin da ya ke karɓar rahoto kan al’amuran tsaro daga hannun kwamishin harkokin tsron jihar Samuel Aruwan.

Ya ce ayyana ƴan bindiga a matsayin ƴan ta’adda zai bai wa jami’an tsaron Najeriya damar murkushe ƴan bindigar ba tare da fargabar cewa ƙasashen duniya za su sanya musu takunkumi ba.

“Mu a gwamnatin jihar Kaduna a koyaushe muna yin kira da a ayyana ƴan ta’adda a matsayin masu tayar da ƙayar baya, domin kuwa mun rubuta wasiƙa zuwa ga gwamnatin tarayya tun daga shekarar 2017 muna neman wannan buƙata”.

Nasir El-Rufai ya kuma ce suna goyon bayan ƙudurin da majalisar dokoki ta kasa kan ayyana ƴan bindiga a matsayin ƴan ta’adda.