Kano ce za ta karbi bakuncin gasar wasanni ta Najeriya a 2022 – Sunday Dare

Ministan Matasa da wasanni na kasa Sunday Dare, ya ce jihar Kano ce za ta karɓi baƙuncin gasar wasanni ta Najeriya mai taken National Youth Game a shekara mai kamawa ta 2022.

Sunday Dare ya bayyana hakan ne yayin ziyarar da ya kai wa gwamnan Kano Abdullahi Umar Ganduje a ofishinsa ranar Asabar 6 ga Nuwambar shekarar 2021.

Ya ce “Wannan shine karon farko da zamu gudanar da gasar a Kano.

Yace “ina cikin jihar Kano lokutan da suka gabata, da hakan ya bani damar halartar gasar Dala Hard Court da aka kammala a jihar,” a cewar Dare.

Dare ya kuma ce sama da Matasa (10,000) ne za su halarci gasar da za ta gudana a jihar, wanda matuka munji dadi da hakan domin kuwa Kano ce jihar da ke da matasa masu son harkokin wasanni kuma cibiyar kasuwanci.

A nasa jawabin gwamnan jihar Kano Abdullahi Umar Ganduje godewa ministan ya yi da ya baiwa jihar damar karɓar bakuncin gasar.

Inda ya ce gwamnatin jihar zatayi duk abin da ya dace na ganin ta samar da mahalli mai inganci da za a gudanar da gasar cikin kwanciyar hankali.