Kano: Matasa sun yi rabon kayan tallafi ga asibitoci

Ƙungiyar matasan mazaɓar Hotoro NNPC, ta miƙa kayan tallafin kiwon lafiya ga wasu asibitoci uku da ke yankin.

Shugaban ƙungiyar Kwamared Jamilu Magaji Saleh Hotoro ne ya jagoranci miƙa tallafin a ranar Laraba.

Kwamared Jamilu ya ce, sun bada tallafin ne duba da halin da asibitocin ke ciki, na rashin kayayyakin aiki.

Da yake jawabi yayin miƙa tallafin Dagacin Hotoro Walawai Alhaji Mustapha Abubakar, ya bayyana farin cikinsa, sannan ya hori ma’aikatan asibitocin da su yi aiki da kayayyakin yadda ya dace.

Asibitocin da suka samu tallafin sun haɗar da, asibitin Hafizu Kawu da ke Hotoro Walawai da asibitin Tsamiyar Boka da kuma na Mai Tuwo.

Dukkan asibitocin suna yankin ƙananan hukumomin Tarauni da Nassarawa.