Kawu Sumaila ya gabatar da kudirin neman soke jinginar filin jirgin Kano

Tun bayan da Sanatan Kano ta Kudu Sulaiman Abdurrahman Kawu Sumaila ya gabatar da ƙudirin soke batun jinginar da filin tashi da saukar jiragen sama na Malam Aminu dake nan Kano, al’umma ke cigaba da bayyana ra’ayoyinsu.

A zaman majalisar na jiya Alhamis ne sanata Kawu Sumaila ya gabatar da ƙudirin a zauren majalisar dattawa, yana mai cewa an tafka kura-kurai wajen shirya bada jinginar filin jirgin.

Tun a ranar 17 ga watan Mayun daya gabata ne dai majalisar zartarwa ta amince da baiwa wani kamfanin Amurka jinginar filayen jiragen saman.

Sanata Kawu ya ce alhakin lura da harkokin filayen jiragen saman kasar nan ya ta’allaƙa ne kan hukumar lura da tasoshin jiragen kasa wato FAAN kamar yadda dokar da ta kafasu ta yi tanadi, don haka ba sa ƙarƙashin ma’aikatar sufurin jiragen sama.

rahoton: Asma’u Muhammad Sani