Kiris ya rage gwamnatin Buhari a kawo karshen Tsaro – Bashir Muhammad

Kungiyar yan takarar jam’iyyar APC ta kasa reshen jihar Kano ta ce nan gaba kadan gwamnatin shugaba Buhari zata kawo karshen matsalar tsaro da ya addabi sassan kasar nan.

Shugaban kungiyar Alhaji Bashir Muhammad ne ya bayyana hakan yayin zantawa da manema labarai.

Alhaji Bashir ya kara da cewa hakkin gwamnati ne samar da tsaro da kare dukiyar al’umma, sai dai ya ce al’umma ma na da gagarumar rawar da zasu taka wajen inganta tsaro musamman waje bayar da bayanan sirri tare da aiki Kafada da Kafada da jami’an tsaro don kawo karshen matsalar.

Ya kuma jaddada cewa gwamnatin shugaba Buhari za ta ci gaba da gudanar da ayyukan raya kasa da bunkasa al’umma don kawar da fatara da kuma samar da ayyukan yi ga jama’a.

Bashir Muhammad, ya yi kira ga al’umma da su dauki gabarar kishin Kasa tare da cire Kabilanci da bangaranci a zamantakewarsu wanda hakan zai taimaka wajen magance fadace-fadace da zubar da jinin al’ummar kasar nan.