Kotun kolin Nijeriya ta tabbatar da Saddiq Wali a matsayin dan takarar gwamna a PDP

A jiya ne kotun kolin kasar nan ta kori ƙarar da Mohammed Abacha ya ɗaukaka gabanta, inda ta tabbatar da Saddiq Wali a matsayin ɗan takarar gwamnan Jihar Kano na jam’iyyar PDP.

Idan za a iya tunawa a watan jiya ne, kotun daukaka kara a Kano ta jingine wani hukuncin Babbar Kotu, inda ta ce ba Mohammed Abacha ne ɗan takarar PDP ba, abin da ya sanya shi ɗaukaka shari’a zuwa Kotun Ƙoli.

A zantawar Freedom Radio da Sadiq Aminu Wali ya shaida cewa hukuncin ya zo a daidai lokacin da suke bukatarsa.

Shi ma lauyan Sadiq Wali din Barista Baba Lawan ya shaida yadda zaman kotun ya kasance.

Wanna na zuwa ne kwanaki 9 gabannin zaben gwamnoni da za a gudanar a fadin kasar nan, wanda kuma dukkanin bangarorin biyu suke neman kujerar gwamnatin Kano karkashin jam’iyyar PDP.

Rahoton: Madeena Shehu Hausawa