Kuɗin makamai: Majalisa ta nemi babban hafsan soji ya gurfana a gaban ta

Majalisar wakilai ta ce wajibi ne babban hafsan sojin kasa na kasar nan laftanal janar Attahiru Ibrahim ya gurfana gaban kwamitinta don ya yi karin haske game da zargin badakala a cinikin makamai.

A Jiya juma’a ne dai kwamitin wucin gadi na majalisar ta wakilai da ke bincikar cinikin makamai ya ki amincewa da wakilcin da babban hafsan sojin ya tura a zaman da kwamitin ya yi.

Tun farko dai dan majalisa Bede Eke daga jihar Imo shine ya gabatar da bukatar tursasa babban hafsan sojin kasar da ya gurafana gaban kwamitin shi da kansa sabanin tura wani na kasa da shi ya wakilce shi.

Yayin zaman kwamitin na jiya dai, ‘yan majalisar sun ki tattauna lamarin da manjo janar Charles Ofoche wanda ya wakilci babban hafsan sojan kasar.

Wannan na zuwa ne a lokaci guda da zargin badakalar cinikin makamai ya sake bulla sakamakon zargin da mai bai wa shugaban kasa shawara kan harkokin tsaro Manjo janar Badagana Monguno ya yi ga tsofaffin manyan hafsoshin tsaro, ko da ya ke daga bisani ya musanta kalaman, yana mai cewa ba a fahimci abin da yak e nufi ba.