Ku murkushe masu fafutukan neman raba Najeriya – martanin IGP ga ƴan sanda.

Mai riƙon muƙamin sufeto janar na ‘yan sandan ƙasar nan Usman Alkali ya bai wa jami’an ‘yan sanda umarnin murkushe duk wasu masu yunƙurin ɓallewa daga kasar nan.

Usman Alkali ya buƙaci ‘yan sandan da su yi amfani da iƙon da suke da shi don tabbatar da cewa sun hukunta masu neman tada zaune tsaye ko kuwa a wani yanki su ke a ƙasar nan.

Ya kuma bayyana takaicinsa kan yadda a baya-bayan nan ake kashe ‘yan sanda a yankunan kudu maso kudu da kuma kudu maso gabashi, yana mai umartar ‘yan sandan da su kare kansu daga ‘yan ta’adda.

Mai riƙon mukamin sufeta janar na ‘yan sandan ya bayyana hakan ne a garin Enugu lokacin da ya ke ƙaddamar da wani atisayen ‘yan sanda mai taken Operation Restore Peace a dandalin Micheal Okpara da ke Enugu.