Kungiyar RANAO ta bukaci a rushe uwar kungiyar tsofaffin sojoji ta Nigerian Legion

Kungiyar tsofaffin sojoji ta RANAO ta bukaci a rushe uwar kungiyar tsofaffin sojoji ta Nigerian Legion da kuma kafa wata hukumar da za ta rika kula da al’amuran mazan jiya a kasar nan.

Jami’in yada labaran kungiyar reshen jihar Kano Kyaftin Yusuf Abdulmalik mai ritaya ne ya yi wannan kiran da safiyar yau, yayin zantawarsa da gidan rediyo freedom.

Ya ce tsawon lokaci tsofaffin sojoji a kasar nan na fama da rashin kulawar hukumomi sakamakon rashin iya shugabanci na jagororin kungiyar ta Legion, a cewar sa ranar mazan jiya ba ta da wata daraja a wajensu a yanzu sakamakon mawuyacin hali da suke ciki.