Kwalejin horas da manyan hafsoshin sojin Najeriya ta kori hafsoshi biyu bisa zargin sata

Kwalejin horas da manyan hafsoshin soji dake Jaji a jihar Kaduna ta kori wasu manyan jami’an soji biyu bisa zargin sata.

Jami’an da lamarin ya shafa su ne Maj I Abdullahi (N/12034) da Lt Cdr MI Madume (NN/2938).

Kwalejin ta Jajin cibiya ce ta horaswa da aka kafa don Sojojin Najeriya, da suka hadar da sojoji, sojojin sama da na ruwa don samar da manyan kwararrun hafsoshin soja.

Wata majiya ta fadawa Solacebase a daren ranar Lahadi 4 ga watan Yuli cewa, an kori Maj I Abdullahi mai lamba (N/12034) sakamakon satar wayar hannu, yayin da Lt Cdr MI Madume mai lamba (NN/2938) aka kore shi saboda satar kudi naira N250,000.